کەیوان محەمەدی " کارێز ژانی " شاعیری هەورامانی سەربەرز
من کەیوان محەمەدی جه زمسانۆ ساڵەو 1363ی وەرەتاوی جه شارو سنەی (چەمۆ حاجی نەسێ) ئامانا دنیا.
چوارساڵ بیەنا یانەما لوان مەریوان و ئیسەیچ جه مەریوان ژیوو.
سەردا و سهوڵه و ئیش و چەڵەمەو ژیوای نەتاواش ورۆ هۆش و ویریم گێرۆ و زەوقۆ هۆنەردۆسیم هەر جه زاڕوڵەییوه وێ نمایی کەرێ.
لوانی مەکتەب و وەنایم دەس پەنه کەرد...هەرچەن دەرس وانایم فره درێژەش نەبێ بەڵام هەرچیم وانا پێسەو وانیارێوه هۆر کەوتەی وانام.
جه مەکتەبەنە هەستێوه جوانم بێ به شێعرێ و فرەو شێعری دلێ کتێبەکا وەر کەرێنا و هەر کاتێوه حەزم کەردایه وەنێناشاوه..
شێعرێ و گۆرانیم فره وەش مسیاو فرەو جاری گۆش گێرو پەی گۆرانیاو ؛ قۆتو ڕوحیما.
سەردەمۆ دەرس وەنایم هەرچەن وانای و نویستەی هەورامیم خاس نەبێ بەڵام فرەم پەنە وەش بێ هەورامی وەنووه و بنویسو.
حەز کەرێنا ئەگەر کەسێوه کتبێوەش جه هەورامانی و شاعرەکاو هەورامانی هەن دۆش لام تا وەنوشۆ.
هەر جۆر نەبۆ تاتەمم ڕازی کەرد تا یەکەم جار کتێبۆ میرزا ئەولقادر پاوەیی و دماتەر کتێبۆ مەڵا مستەفای بێسارانیم پەی سانۆ و فرەو جاری تا ئاخرۆ شەوێ نیشێناره و وەنێناشاوه.
وەختێ دمایی کتێبۆ مەولەوی و سەیدی و فرەو جه شاعرەکای تەریم وەنایوه و شێعرەکام وەر کەردێ زانام هۆنەرۆ هەورامانی بێ وێنەن و هەورامان وەڵاتێوه تایبەتا.
جه سەردەمۆ دەرس وانایمەنه چن جارێوه لوانی ڕادیو مەریوان و جه بەشۆ هەورامی ڕادیو مەریوانینە بەشداریم کەردو شێعرێ شاعرەکاو هەورامانیم وانایوه.
ئەۮا و تاتەم یەکەم هاندەرێم بێنێ پەی شێعر نویستەی و وەشحاڵەنا جه بنەماڵیه هۆنەر دۆسینه ژیواینا.
ساڵەو 1394 ی وەرەتاوی کتێبێوەم به نامێ وەشەویسی جه دەزگاو چاپ و پەخشۆ ڕێبازی جه شارۆ مەریوانی چاپ کریا.
ئی کتێبه جه 100 لاپەڕینه به نامێ 《وەشەویسی》که سەرجەم شێعرێ عاشقانێنێ چاپ کریان.
زیاتەر جه دوانزه ساڵان شێعرێ منویسو. شێعرەکام ڕومانتیکێنێ و جار جارێوەیچ دوه بەیتیی منویسو.
وەشەویسی وەتەنی و پارێزنای ئەدەب و فەرهەنگۆ وەڵاتەکەیم پاسەش بار ئاردێنا بەشێوه فرەو شێعرەکام پەی هەورامانیم واتێنێ .
ڕاسا واتم جه شارۆ سنەی ئامانا دنیا و جه شارۆ مەریوانی ژیواینا بەڵام هەورامانی به وەتەنیم زانو و چون باب و باپیرم جه دەگاو《 ژان》ی ژیواینێ منیچ وێم به ژانی زانو.
دەگاو (ژان)یم پێسەو گرد لایە هەورامانی لاوە وەشەنه و هەوراه وەشەکەو 《شادەره》ی بەهەشتا پەیم و هانه چەمەکەو《کارێز》ی مایەو ژیوایمەن هەر پا بونەوه ناسنامۆ وێم نیان (کارێز ژانی)
نموونەی شێعر
هەورامی مایەو بەرزی وەڵاتی
دەسۆ وهەڵاتۆ بێ ده سەڵاتی
تۆ هەڵوی لوتکەو بەرزو شاهۆنی
نەتەرس و نەمر تۆنی حەر تۆنی
مەمانۆ نامت تا قام قیام
کانگاو زانایی ودەرک وعەقڵ و فام
شەو نەوتەی شەوان؛تەقالات به ڕو
کام وەڵات نیەنش ئەوەجه به تۆ؟
هەورامی؛خەیلێن به ئەوج یاوانی
گێرتەن قەڵاو هۆش و زانایی
شانازیم ئانەن هەورامین زوانم
وەته ن فیدات بۆ گیان و سامانم
کەیوان محەممەدی《کارێز ژانی》
https://t.me/joinchat/AAAAAEFbZso8hCm2bNvK6w
✮ یاگێ دڵوەشیم ✮
بەگیانت دڵم هیشتا جە لاتەن
کەی تەشریف ماری؟ چەم چەمەڕاتەن
نەکەری لۆمەی دڵەی ژەنگاویم
زانانت کەیلی عەهد و وەفاتەن؟
ئەسپەردەم کەرە جە یانەی سینەت
(کەیوان) شەهیدی نازی نیگاتەن
من دایم وەشی تۆ ئاواتمەن
چی من جەلای تۆ خەمم خەڵاتەن؟
هەر وەختێ مەیلم تەوافی تۆ بۆ
جە بەۮ ئێقباڵیم ڕای هاتم ماتەن
قەدەم ڕەنجە کەر،بۆرێ وە یانەم
دیدەم منەت بار گەرد پاڵاتەن
هەناسەو ژیوایم ، یاگێ دڵوەشیم
تۆ نەبی جەلام دڵوەشیم قاتەن
دیدەم چی قابل کەریش بە ماوا؟
وەزەرە واری تۆی دڵ ماواتەن
خیاڵت چێشەن من جیا مازی ؟
پەی چێش چەنیمان جەنگ و داواتەن؟
گیڵەوە ئازیز ڕەحمی خەیرت بۆ
نا،نا،نا ، مەلە دڵ تۆش ئاواتەن
کەیوان محەممەدی (کارێزژانی)
1395/12/16
ناوم سەلاح کوردی لە دایکبووی ساڵی ۱۳۳۹ی کۆچی ڕۆژیم . خزمەتگوزاری فەرهەنگ و ئەدەبی گەلی کوردم . بۆ باشتر بەڕێوە بردنی ئەم ماڵپەڕە ، چاوەڕوانی ڕەخنە و پێشنیاری ئێوە هاوڕێیانم.