کەوکەبی مینا
کەوکەبی مینا
چاوت کە دەڵێی کەوکەبی مینایە لەسەر ڕووت
ڕووت ڕۆژە بە تیرێژی دەکا کایە لە هەر سووت
ئەو پۆلە موژەت تاجە لەسەر شاهی دوو چاوت
یا خۆ بە مەسەل ئەرتەشی عەزرایه بە جادووت
مردوو، وە نەفەس دێنێ گڕ و تینی هەناسەت
جوان دیاره هەچی قودرەتی عیسایه، لەیەک فووت
دەم دەم کە دەمت هەمدەم و یاوەرمە لەخەودا
دیدەم دەکەمە قۆچی تەمی چاوی خەواڵووت
چەل چەل کە قژت شۆڕە هەتا چاڵی چەناگەت
چڵ چڵ دەوەرێ چیغی هومێدم بە چڵی مووت
گێژگێژه سەرم، گاژە لە حاند گێژەوی کەزیەت
گەوگەو کە دەبێ گەوهەری گەردانەیی گیسووت
خێچ خێچە قەدم، خوارە لە مەر خەڵفی خەرامان
خەت‌خەت بووه جەرگم بەخەتی خاچی دوو ئەبرووت
قات قاتی دڵم مەنزڵی قوڕئان و قەڵەم بوو
جووت جووتی برۆی ژێری جەبین کردمی دین جووت
هەر جا کە بڕەخسێ هەلێ بۆ هەڵمەتی "هەڵگورد"
قەف‌قەف وەکوو مار قۆڵ دەخەمە گەردنی وەک قووت
"هەڵگورد" پەسوێ
ناوم سەلاح کوردی لە دایکبووی ساڵی ۱۳۳۹ی کۆچی ڕۆژیم . خزمەتگوزاری فەرهەنگ و ئەدەبی گەلی کوردم . بۆ باشتر بەڕێوە بردنی ئەم ماڵپەڕە ، چاوەڕوانی ڕەخنە و پێشنیاری ئێوە هاوڕێیانم.