ناسر خزری "ئاسنگەر" لەشاری شەهیدی سەردەشت
مامناوەندی لە دایک بووم. ناویان نام ناسر، ئەوکات برایەکی گەورەترم هەبوو بە ناوی عەلی کە ساڵێک لەخۆم گەورەتر بوو. ئەوەندەی کە بە بیرمە دەورانی منداڵیەکی خۆشم لە ئامێزی بنەماڵەم دا هەبوو تا تەمەنی حەوت ساڵی پۆلی یەکەمی سەرەتاییم لە قوتابخانەی (ڕەساڵەت) لە شاری سەردەشت دەست پێ کرد. ئەوکات بابم (مامۆستا قەلەندەر) لە قوتابخانە مامۆستام بوو. بە هۆی شەڕی نێوان عەڕاق و ئێران کە بەداخەوە داوێنی نەتەوەی کوردی گرتەوە و بە هۆی تۆپ باران، ماڵمان لە سەردەشتەوە چوو بۆ کاوڵانی خوارێ. پۆلی دووهەم و سێهەمی سەرەتاییم لە کاوڵان خوێند. مامۆستاکانم مام شەریف و میرزا حوسێن بوون. سەردەمێکی هەتا بڵێی خۆش و پڕ لە ئەزموونم لە کاوڵان تێپەڕ کرد، ڕۆژانە لە ڕووباری کاوڵان و کۆنە کورانێ خەریکی مەلە کردن و راوەماسی دەبووین لەگەڵ هاوڕێکانم. یان لە مێرگ و رەز و دارستانی دەور و بەر خەریکی کایە و گاڵتە و گەپ بووین. ئەو دوو ساڵانە بابم لە قوتابخانەی ( کەڵەکاویە ) وانەی دەگوتەوە. دیارە هەر ئەو سەردەمەشیان بوو کە گۆێم بە مۆسیقای خۆش و دلاوێنی شێعر و هۆنراوەکانی بابم پڕ بوو. بابم بێجگە لەوەی کە ئینسانێکی زۆر زەحمەت کێش بوو، خاوەنی کەسایەتیەکی ئەدەبی و نووسەرێکی زۆر بە توانا بوو. هەرچەند لە ڕێی ژیانی خۆی دا تووشی زۆر کۆسپ و تەگەرە هاتبوو بەڵام هیچ کات لە بەرانبەر ژیانی پڕ لە چەرمەسەری چۆکی دا نەدا و بە کەم یان بە زۆر بەڕەی خۆی لە ئاو دەردەکێشا. بە بیرم نیە کە کەنگێ بوو فێری نووسین و خوێندنەوەی کوردی بووم، هەر لەو سەردەمانەی کە شێعرەکانی بابم دەخوێندنەوە و زۆر جارانیش دەمنوسینەوە خولیای دونیای شێعر و ئەدەبیاتی کوردی بووم، هەر ئەوەش هۆکارێک بوو کە کوردپەروەری و بەرخودان بۆ نەتەوەی کورد لە داهاتوو دا بگرمە بەر.دوابەدوای ئەوەی کە شەڕ کۆتایی پێ هات ماڵمان هاتەوە سەردەشت و هەتا پۆلی سێهەمی ناوەندی دەرسم خوێند. مانگی خاکەلێوەی ساڵی ۱۳۷٦ ی هەتاوی لە بنەماڵەم دابڕام و ڕێگای غوربەتم گرتە بەر و تاکو ئێستاش هەر لە غوربەت و لە وڵاتی نۆڕوێژ نیشتەجێم. زۆر تاسەی خاک و نیشتیمان دەکەم بەڵام بە داخەوە هاتنەوەم ناکرێ و منیش وەکوو هەزاران رێبواری دوور وڵات، چاوەڕوانی هەڵاتنی خۆری ئازادیم کە بگەڕێمەوە بۆ ئامێزی دایک و خەڵکم. دیارە شێعر وەکوو مەرهەمێک دەبینم بۆ ساڕێژ کردنی دەرد و مەینەت و ئازارەکانم، لە نوسینیش دا بە هەردووک جۆری شێعری کلاسیک و نوێ دەنووسم. پێم خۆشە ئەوەش لە کۆتایی دا بڵێم کە هەرچی هەم و هەر تواناییەکم هەیە، لە باب و ئامۆژگاری هەمیشە خۆشەویستی خۆم مامۆستا قەلەندەری دەزانم. ئێستا تەمەنم ۳۷ ساڵە خاوەنی خێزان و دوو کوڕانم و بۆ داهاتوش زۆر گەشبینم.
ناسر خزری (ئاسنگەر) ۱٦،٠۳،۲٠۱۷
لە شێعرەکانی ئاسنگەر
به‌رز و نزمی له‌شی شلکی که‌وته سه‌ر جه‌سته‌م به تاب
گه‌رمی سینه و مه‌مکی کاڵی مه‌ستی کردم بێ شه‌ڕاب
تا هه‌ناسه و عه‌تری زوڵف و شه‌هدی لێوم هه‌ڵمژی
هه‌ر هه‌موو جه‌وری جیهانم بوو به یه‌ک خه‌ون و سه‌راب
مه‌یزه‌ده‌ی کردم به ناز و بوومه په‌روانه‌ی شه‌می
هه‌ر هه‌موو جه‌سته‌ی ده‌لاوێنم به بێ زۆر و که‌می
ئه‌سته‌مه ده‌رچێ له ناخم مه ستی نازی چاوەکەی
تا نه‌که‌م ماچێ له سینه و گه‌ردن و لێو و ده‌می
بوومه جه‌زمی زیکری ئاخ و ئۆف و ناڵه و های و هوو
خه‌نجه‌ری شێخ بوو مژۆڵی وا ده جه‌رگم ڕاده‌چوو
دڵ وه‌کوو ده‌ف بوو په‌رێشانیی سه‌ری که‌زیه‌ی ژه‌نێر
خانه‌قایه‌ک بوو چ سه‌رشێت بووين به ته‌نیا دووبه‌دوو
هەر وەکوو بابردەڵە وێڵی هەوای تۆمە گوڵم
سەردەمێکە داگراوی و بویەتە مۆمی دڵم
بێ سەر و شوێنم لە باخی سینەتا شیرینەکەم
دوور لە دیدەت دۆزەخێكە چوار دیواری مەنزڵم
لێوی سوور و کوڵمی گەش نەخشین بە خاڵ وسایەیە
بەژن و باڵای شووشی ڕێكت کاری کام وەستایەیە
هەڵقوڵاوی کامە کانی ژیری ناو کام باوەشی
دەک ڕەبی بمرم دەبەر شەهدی مەمی ئەو دایەیە
ئەی کە دڵخۆشم لە شایی تۆ کە دۆی شەرمینمی
دەست لە ناو دەستت ئەوینم یاری خوێن گەرمینمی
من نە زەردەشتیم نە بودا نە یەهوودی نە مەسیح
تۆ خودامی و قیبلەگای پڕ شەوکەتی ئایینمی
ئاسنگه‌ر
پەیکەر
کاتێ زوخمی نیگاکانی
بوونە شەختە لەسەر گیانم
تەرمی بێ رووحی مەلی دڵ
لە قەراخی شەقامی شار
بە هەناسەی وەرزی پاییز گلی دەدا و
پەڕ و باڵی دەشنانەوە
.
لەو کاتەوە پەیکەرێکم
ئیمپڕاتۆرێکی نامۆ بنیادی نام لەو شەقامە
پەیکەرێکم مێژوو ویستی
بۆیە ئێستاش من تێ ناگەم
چیە مانای خۆشەویستی
ئاسنگەر
ناوم سەلاح کوردی لە دایکبووی ساڵی ۱۳۳۹ی کۆچی ڕۆژیم . خزمەتگوزاری فەرهەنگ و ئەدەبی گەلی کوردم . بۆ باشتر بەڕێوە بردنی ئەم ماڵپەڕە ، چاوەڕوانی ڕەخنە و پێشنیاری ئێوە هاوڕێیانم.